أخبار الموقع

قصة نجاح المهندس المدني سامر العبود في كندا ..



السيد سامر العبود مهندس مدني ... بدآ مشواره في البحث عن عمل ...  قبل وصوله لكندا ... أحب أن يشارك تجربته معنا ... و تركت مشاركته كما هي بدون آي تعديل ....



الجزء الاولسأتحدث عن تجربتي الشخصية كمهندس قضى فترة ٨
سنوات في الخليج وتركته في عز عطائي لتحقيق الحلم الكندي
انا جيت على كندا وعملت لاندينج في تورونتو ونزلت عند صديق لبناني كان زميلي في العمل في الامارت استضافني مشكور وكنت يومها متفائل بالخير الى ان اقام المسكين حفلة على شرفي في بيته وعزم بعض معارفه اللبنانين وذلك ليعرفني عليهم عسى ان لاقي عمل معون او يكونو سبب في ايجاد عمل من خلال شبكة معارفون الواسعة
اول كلمة بعد مرحبا انت شو جابك من دبي بوشك رجاع هاي بلد شحادة وتعتير يا عمي
المتكلم مقاول تقدر ثروته ب٢٠ مليون دولار ويقول لي هذا الكلام وتتابع البقية على نفس المنوال وكل شخص يسرد معاناتو في البلد وانو ماشافو فيها خير والى اخره وبعد مغادرتون قلي صديقي كلمة صغيرة قلي اوعى تسمع الون هدول عملو مصاريون هون وكل واحد نايم على مليون دولار بالميتة فلا تسمع لحدا واسعى بتلاقي
انا يومها بقيت فترة وارجعت لحتى ازبط اموري استعدادا للعودة او عدم العودة لانو ببساطة ما حبينا كندا من اول مرة وبقينا مترددين وخصوصا انو نسمع قصص الناس وكيف بلشو حياتون وقصص الفشل والنجاح والي كنا مستصعبينا كتير مقارنة بالخليج الي كنت فيه بمستى رفاهية عالي
المهم بدأت حط خطة لايجاد عمل وانا خارج كندا تقوم على فهم السوق الكندي شو بدو :
اول شي بدأت بكتابة سيفي على الطريقة الكندية وحكيت مع موقع كندي متخصص في كتابة السيفي الاحترافي وكلفني السيفي حوالي ٢٠٠ دولار كندي شامل سيفي وكڤر ليتر وفولو اب ليتر واشياء اخرى سخيفة
ثاني شي قمت بتزبيط حسابي اللينكد ان واطلعت على كثير حسابات لاشخاص كنديين وطريقة تنظيون للحساب بشكل دقيق واخذت افضل شكل ممكن وقمت بالاتصال بكافة الاشخاص الي اشتغلت معون بكل مشروع وطلبت يعملولي ريكمندايشن وركزت بشكل اساسي على البريطانيين والامريكان والكنديين لانو هدول الي بيعطوك المصداقية بالنسبة للكنديين
قمت بعدها بالبحث عن كافة شركات التوظيف في كندا وقمت بمراسلتون وعملت مقابلات معون على السكي بي
اخيرا قمت بمراسلة عدة اشخاص مقيمين في كندا من خلال اللينكدان واسألون عن طبيعة العمل وفهمت كيف هالناس بتفكر وتجارب هالناس وطبيعة المقابلات وشو الاسئلة الي بيسألوها في مقابلات العمل
طبعا في ناس تجاوبت وناس لا لكن المحاولة جيدة وعطتني فكرة ممتازة
عملت مجموعة من كورسات في معاهد كندية اونلاين واشتغلت على فحص ال FE exam لكن للاسف ما قدرت قدمو في الامارت بسبب ضغط الشغل
ومن خلال عملي في الامارات اتعرفت على اشخاص اشتغلو بكندا وعرفوني على معارف حاولو يساعدوني جدا وقدرت حصل انترڤيو مع شركة شل البترولية ولكن للاسف التغت الوظيفة بعد فترة وكل الشركات الي حصلت معها انترڤيو كانت شركات غير كندية شغالة في كندا وكانت بدها ناس في اماكن نائية وبعيدة عن المدن الكبيرة وكنت ارفضها لانها ببساطة غير مناسبة والعرض كان صعب جدا
في يوم من الايام بيبعتلي شخص استرالي على الينكدان انو في فرصة عمل في ساسكاتشوان مع شركة الكهرباء الرئيسية وانو بدن شخص يكون عندو خبرة في ابراج التوتر العالي ومحطات التوزيع الكهرباء ليتابع شغل المقاولين وكان الشغل اسبوع بالموقع واسبوع بالبيت وشرطو علي الاقامة في ريجينا وطبعا انا هون قبلت بدون تردد وخلال الانترفيو سألنويعن سيفيتي واعمل محطات التوزيع الي اشتغلتها لشركات البترول وابراج التوتر العالي ولم يسألوني عن اي معادلة او حتى اي خبرة كندية وانما كان النقاش عن هذا المطلوب فقط وبعد فترة رجعو اتصلو فيني لمناقشة عرض العمل والراتب ووقت العقد معون بالايميل
طبعا كل شخص اتصو فيه كريفرنس اتصل فيني وقليو شو حكو معو والمفاجئة لم يتكلو الا مع الاجانب فقط ٢ بريطانين ولم يتصلو باي ريفرنس عربي او هندي
والي فهمتو منون انو مش ملاقين حدا يشتغل هالشغلة او حتى يقبل يجي على ساسكاتشوان ولذلك صارو يدورو برا كندا وهادالمكتب في استراليا هو صديقو وساعدو بالموضوع
المهم انتقلت على كندا بلشنا الشغل بعد شهر في الموقع وكانت ايام صعبة وخصوصا العمل مع ناس مفكرينك جاي من العصر الحجري وراح كمل هالبوست بالتجربة وشو استفدت منها في دروس مفيدة الكون 
 الجزء الثاني
بدي كمل البوست ال حطيتو سابقا عن ايجاد العمل بالحديث عن العمل بحد ذاتو والمصاعب والايجابيات الي لقيتها
انا لما انتقلت الى كندا من شان الشغل وصلت في اخر شهر ديسمبر ( كانون الاول) ووقت وصولنا مطار ريجينا كانت درجة الحرارة برا -٣٨
والدنيا برا مو مبينة ملامحها من كتر الثلج المغطي كل شيء وبعد رحلة طيران استمرت تقريبا يوم كامل مع طفلين واحد مرتفعة حرارتو و١٧ حقيبة سفر وصلنا طبعا مافي حدا في المطار يستقبلنا واخدت تاكسيين ووصلنا الى الاوتيل والتحدي الاكبر كان ايجاد خافض للحرارة لابني ووشوية اكل النا بنص الليل وربك رحيم لاقينا علبة خافض حرارة كنا مخبينا بشنتاية من الشناتي مشينا حالنا فيها ومن تعبنا نسينا ناكل
تاني يوم بدأت رحلة استآجر السيارة وتدبير اكل والبحث عن بيت واليوم الاول دورت على شي خمس ست بيوت ولاقيت شقة مفروشة واستأجرتها ويحكى الحق مديري الكندي هو الي لاقالي ياها وعملي ركومندايشن عندن وانتقلت عليها كمان على خمس نقلات والجماعة ما خدو مني الاجار لاخر الشهر وانتقلت بعدها على شقة اكبر بعد ما اشتريت عفش .
كل ما سبق بعمل معك حالة من الارهاق والنرفزة واحيانا بحسوك الناس معتوه لانو اصلا في جت لاج ومانك صحيان لشي وبعد الكرسمس اتصلو فيني وقالولي من شان اجي على اول لاقاء عمل في احد الاوتيلات:
اول لقاء صار معي موقف سيء لما رحت على اللقاء جمد موبايلي من البرد وطفي وضيعت الطريق وقفت على جنب الطريق وحطيت الموبايل تحتي دفيه لبين ما تدفى السيارة بقيت شي ربع ساعة لحتى اشتغل واتأخرت واتزحلقت بالسيارة عدة مرات وقطعت الاشارة الحمرا لاني اتزحلقت لبعد الاشارة وكان احراج كبير بس شرحتلون الموضوع لما وصلت وضحكو وكانو كتير لطيفين الحقيقة
في اليوم التالي عملنا ورشة عمل وفهمنا المهام الموكلة واليوم الي بعدو عملنا لقاء مع شركة الكهرباء الحكومية والي راح نكون ممثلين الها في المشروع كجهة ادارة مشروع
طبعا اللقاء كان صعب وكان نوعا ما مدير المشروع في شركة الكهرباء ما عجبتو وحسيتو انو مو كتير متأكد اني راح قوم بالمهمة وانو باعتباري ماني شغال في كندا فهذا دليل على ضعف خبرتي واشياء متل هيك وبعدين بلش يسألني عن اسألة خاصة بالكهرباء ففهمتو اني حتى لم اطلع على اظبارة المشروع وما بعرف شيء عنو فمابقدر جاوبو على شي بس ممكن احكيلك عن المشاريع الي عملتاه سابقا واللقاء كان مشحون نوعا ما وانا الحقيقة بقيت على اعصابي لايام لحتى اتصل فيني مديري وبعتلي اظبارة المشروع وطلب مني عمل مخطط زمني وهون اطمنت شوي وطبعا انا اشتغلت بكل ما اوتيت من علم وتفكير وجهد لحتى اثبتلون اني قد الشغلة وعملت برنامج زمني جيد على البريمفيرا وجبت على اول اجتماع والحقيقة ذهلو وما كنو متوقعيني بقدر اعمل هيك شي وما كان عندون برنامج مراقبة جودة للاعمال المدنية باعتبارون شركة كهربا فبدأت بعمل فورمات كاملة للاعمال المدنية متل الحديد والبيتون والاعمال الترابية وتقارير وملفات اكسل للانتاجيات وهيك شي فذهلو بكل معنى الكلمة وهون بلش اللهجة تتغير بشكل واضح مع بقاء الشك يعني وطلبو مني اشياء لمراقبة كلف الانشاء وعملتلون ملفات الى هذه اللحظة بيستخدموها وخصوصا ادارة المواد والي كان عندون كارثة حقيقة في ادارتها على مستوى الولاية
ونزلت على الموقع في اول فبراير وكان برد قاتل لحتى اعمل جرد على المواد بدرجة حرارة -٣٠ والله وكيلكىن اطلع ١٠ دقايق برا السيارة اعد مواد وارجع اقعد بالسيارة ربع ساعة وبقيت هيك لبين ما خلصت الجرد وكان معي واحد بيتناوب على الجرد بنزل انا بيبقى هو وبنزل هو ببقى انا وتعى شوف معظم المواد مطمورة بالثلج ومعنا كريك وبايدينا نزيح الثلج لنتأكد من المواد مطابقة وطبعا في ارض قفرا نفرا مع الضباع الضارياتي شمال ساسكاتون ونقطع بالسيارة فوق النهر المتجمد ايام بتذكرها بقول كيف قضيتها
وطبعا بدك تصلي بتتوضى جوا السيارة وبتمسح على البوط وبتصلي جوا السيارة يعني حكاية بحد ذاتها والموقع كان بعيد ٣ ساعات عن ريجينا. يعني بدك تسوق لهونيك وتنام ليلية بفندق وترجع تاني نهار او ترجع بنفس اليوم
ومضيت الايام
كان في معناة في الشغل لسبب هو:
الناس في ساسكاتشوان معظمون فلاحين ومحافظين وهاردكور رد نيك ( بيض للنخاع) وكان وجود ملون متلي وعربي و في مكان ادارة في المشروع وفي مشروع حكومي وممثل لشركة حكومية كبيرة كتير بحقون وما يعجبون هالشي وثانيا كان معظم الفاحصين من المتقاعدين في شركة الكهرباء وتم التقاعد معون من شان هالمشروع فكانو ينظرولي نظرة مهندس حديث التخرج او حتى نظر كبير عمبيحكي مع ولد صغير وكان هاد مشكلة وخصوصا انو مسموعين الكلمة بالاضافة انو تعاملي مع بعض المزارعين الي كان يمر خط الكهربا بارضون مشكلة بحد ذاتها وخصوصا انو ما بيطيقو الغريب والكلاب تبعتون وانا بكره وبخاف من الكلاب بصراحة فكان نوعا ما الامر صعب بالاضافك الى لهجتن الصعبة
وبعد هذاكلو التعامل مع الوزرات والمؤسسات المختلفة متل وزارة الطرق وسكك الحديد و وزارة البيئة و محميات الهنود الحمر وادارة المسطحات المائية بالاضافة الى جماعة السلامة المهنية والشرطة كلو بدو تصاريح واشتراطات وبعد هذا كلو بيجيك موسم ذوبان الثلوج وموسم تكاثر الطيور والبومات ونقل الاعشاش وبيوقفوك على اتفه سبب اذا في وزة فكرت تبيض جنب محل شغلنا طبعا بالاضافة الى البعد عن الاهل والوضع في حلب و اهلنا المشندلين كلو كان صعب
الناس الي معي بالبداية متل ما قلت كانو مو طيبين ابدا بس انا اتبعت استراتيجية طعمي التم بتستحي العين عزمت كل واحد على حدة على العشى واكرمتو منيح وصدقا بالله صارو متل السمن على العسل بعدين لك لدرجة صارو يجبولي قهوة معون ويمدحوني قدام الادارة
وهاد لمستو معن كلن وهاي شغلة بنصحكون فيها وهو كسر حاجز الجليد بينك وبينون علما انو معظمون من جماعة موتورات هارلي دايڤدسون جماعة التاتو الي بتحسون ازلات بس اكتشفت نسبة كبيرة منون طيبين بس لا تفتح قلبك الون كتير لانون متل جماعتنا بيوصلو حكي وفي حر ولوص ومراقبين تحركاتك على الملي
حاول دوما تخلي علاقتك جيدة مع الكل ولا تتفاخر بخبرتك ورجيون ياها على ارض الواقع وهاد الي بيعطيك الكردت وبيبني السمعة الطيبة
الكنديين فيون شغلة هو انو بيخبو البلد كتير لذلك لا تذمها قدامهن ولا تذم بلدك كمان اهم شي
ولازم تعرف انو هما ما بيحكو شي عبث بيفتحو موضوع لاستدراجك لتقول شي فانتبه دوما كل كلمة محسوبة سواء في الشغل او في موضوع المشاكل في بلادنا العربية
هما اخر همهم شو بصير هونيك الحقيقة وحاول تتطلع على اكتر الامور الي بيحبو النقاش فيها وهي الهوكي والبايسبول والفوتبول و شو اشهر الفرق وطرق اللعب وحاول تشارك بنشاطاتون قدر الامكان ومافي داعي تسايرن بشي ما بدك ياه متل المشروب او البورك خليك واضح معون في متل هيك مواقف بطريقة ودودة ومحترمة بدون الدخول في تفاصيل ليش وشو السبب ولا تخاف كلهون بيعرفو كل هالامور وهما محترمين عموما
راح تلاحظ كلامون فيه مسبات كثيرة جدا فلا تندمج كتير في هالامور
راح تلاقي شاذين في موقع العمل مالك فيون واتعامل معون بطريقة طبيعية ومالك فيون
حتلاقي نسوان بيشتغلو في صب الباطون وشوفيرة رافعة وغيرها اتعامل معها باحترام
اللهجة تختلف من منطقة الى اخرى حاول فهم المراد قبل الاجابة حتى تفهم ما يريد
حتلاقي هنود حمر صعبين حاول تكون ودود معون وحذر بنفس الوقت
خلي تعاملك كتابي لانو التعامل الشفهي فيو مشكلة معون وممكن يتحججو انو ما عمبيفهمو عليك
نحكي في الجزء الثالث عن فترة البطالة. الي عديت فيها
 الجزء الثالث مرحلة العطالة عن العمل
قبل البدء بالحديث عن هاي المرحلة حابب كمل كم شغلة نسيتون وممكن يكونو مهمين
اول شي تجربتي متل بقية التجارب في صعود وهبوط وفي سوريين كتير نجحو هون من اول فترة حتى من اللاجئين الجدد الغير متعلمين لذلك لا تيأس ابدا وممكن احكي عن تجارب بعضون في بوستات قادمة ان شاء الله
ثانيا بيسألني البعض عن عمري انا في متوسط الثلاثينات وخريج جامعة حلب هندسة مدنية سنة ٢٠٠٤
ثالثا بس طلعت على كندا واخذت القرار بدك تنسى الخليج لانو المقارنة بشو هنيك وشو وهون ماراح يخليك الابحالة كآبة انا و مرتي بقينا فيها لمدة طويلة
رابعا في كندا ما بقى في لا كومار ولا اكبر خان يعملك قهوة او يمسح الارض او المكتب بيسلمك مكتبك في الموقع وبيقلك هلب يور سلف ومحسوبكون بيتخيل حالو كومار وبينضف تحت مكتبو وبيمسحو وبعد فترة بتهز راسك لحالك وانت بتنظف وبتقول ايامك يا الامارات
منكمل ما بدأنا فيه بعد انتهائي من مشروعي الاول انتقلنا الى مشروع جديد على حدود البرتا حوالي ٥٠٠ كم بعيد عن ريجينا والمشروع كان صغير وخفيف وخلصنا جزء كبير منو بسرعة بس تم ايقافو فجئة لسبب بيئي وهو انو الخط كان بيمر بمنطقة كثبان رملية .... نعم كثبان رملية مغطاة بطبقة عشبية وكان اذا حفرت فيها بيطلع رمل متل الي منشوفو بالخليج وهاي منطقة حساسة جدا وطلبو منا عدم كشف الغطاء النباتي لذلك وقفنا حتى يتم البت فيه وهون وقفت عن الشغل لمدة حوالي اسبوعين لاتفاجئ بمديري بيقلي شركة الكهرباء ما عندها مشاريع وانو قررو انو ما تابع بالمشروع لانو ما بقي غير جزء صغير اقل من اسبوعين شغل والباقي راح يكملو مدير المشروع
المهم قلي كمان انو هو عمبيدور لي على شغل وانو حاليا ماراح يقدر يدفعلي رواتب وانو راح يعملي تسيرح مؤقت بعد اسبوع ويحطني على تأمين العطالة )employment Insurance)
وهنا بدأت قصة العطالة ... طبعا الجماعة خلوي معي موبايل الشركة والابتوب ومفتاح السيارة بس خلوني حطها في كراج بحيث ما استخدمها
وكل فترة بيتصلو بيحكو انو عمنحاول نلاقي شغل الك وبعد فترة شهرين عرضو علي شغل في ولاية northwest territories بس ٢١ يوم موقع و اسبوع بالبيت وانا رفضتو لانون ببساطة كانو بدن يغيرو العقد بشروط سيئة وهون قالولي هاد الموجود وطلبو مني تسليم الموبايل والابتوب والمفاتيح وصرت عاطل وابحث عن عمل وهون الحقيقة كنت مكتئب جدا وخصوصا اخبار الاقتصاد العالمي والكندي واخبار البرتا لا تبشر بالخير بعد نزول سعر النفط معظم الشركات جمدت مشاريعها و سرحت كتير من موظفينها وبلشت قدم على شغل هنا وهناك ولكن ما كان في رد واحيانا يردو بانو انت اوڤر كولايفيد واحيانا انو تم الغاء العمل وعملت مقابلات مع شركات توظيف وكلها كانت تعطيني وعود بس مافي شيء وفي يوم من الايام قليدخلت على موقع شركة امريكية شهيرة حتى في الخليج ولاقيت عندون شغل في ريجينا وبدن منسق مشروع project coordinator وبمتطلبات خبرة في الموقع وقدمت عليها واتصلو فيني خلال يومين من امريكا وحكو معي وسألوني عن خبرتي وخصوصا في ساسكاتشوان وشو اشتغلت وبعدين غطت شي اسبوعين ورجعت خبرتني انو راح يعملو معي مقابلة بعد ٣ اسابيع و رحت المقابلة وكان الي راح يقابلني شخص اسكتلندي شاب تقريبا بعمري ومريح جدا وبشوش لدرجة انو ما حسسني بكل المقابلة وكل حديثنا كان شو اشتغلت واكتر شي عجبو شغلي السابق في الامارات اكتر من كندا تصور يا رعاك الله وبعدها اخذني عرفني على فريق المشروع مباشرتا وقلي العقد وبقية الامور بتناقشها مع الاتش ار وراح نطلبلك كمبيوتر وقلي زبط امورك قبل ما تبلش شغل وهاد الي صار
هلا فترة دوارتي على الشغل انا عملت فيها عدة كورسات : وحدة في فحص الابنية ووحدة في العقود ووحدة في حصر الكميات وكان الغاية الاستفادة من الوقت وبنفس الوقت مساعدة اللاجئين الجدد ولعب التركس والطرنيب ومزادات السيارات والسياحة والسفر في الهوم ديبو
اهم النصائح بهاي الفترة:
الدعاء والصدقة والتوكل على الله ثم
١- اتصل بكل معارفك العمل شوف شو عندن شغل لانو ٨٠ ٪‏ من الوظائف الخاصة في كندا بتجي بالتزكية ويتم الاعلان عن ٢٠ ٪‏ فقط اما الحكومية فلها نظام مختلف
٢- حاول تكبر دائرة المعارف من الكنديين وهدول المفيدين برأيي من ناحية الشغل
٣- لا تقدم عن طريق اي وب سايت شركة وانما شوف شركات التوظيف اولا لانو هدول الون اسلوبن وبيصلو للاتش ار مباشرتا وبيعطوك ملخص عن التقدم في ملفك
اما الوب سايت للاسف متل الثقب الاسود ما بتعرف عجب كبوها بالزبالة والا حدا عبرها من الاساس واذا انرفضت في احتمال انو تنرفض لكل الفرص القادمة مع نفس الشركة
٤- استغل وقتك بشيء مفيد متل كورس او قراءة كتب او اللعب مع الاولاد
٥- لا تمسكها حزن كآبة وخليك متفائل بالخير
٦- شو ماصحلك شغل حتى تطوعي اعملو
٧- شارك بفاعليات الجالية وخلي الجميع يعرف انك عاطل عسى انو حدا يدلك على شي باب توظيف
٨- سجل بشي نادي رياضي خفف من الكرش الي راح يطلعلك لا محالة في كندا
في الجزء الرابع بحكي عن تجربتي الحالية ان شاء الله

العمل في كندا : الجزء الرابع ..
راح اتحدث في هذا الجزء عن تجربتي الحالية ومتل ما حكيتلكون انو الي قابلني كان شخص اسكتلندي بشوش ومرح وهاد الشخص اصبح مديري فيما بعد
المشروع الي عمبشتغل عليه حاليا هو اكبر مشروع خدمات في تاريخ ساسكاتشوان وهو عبارة عن طريق عابر بيلف حوالين ريجينا من الاسفل لتحويل كل السير الجاي من ولاية مانيتوبا وبيوزعون على طريقين هما الطريق الى كالجاري والطريق الى ساسكاتون / ادمنتون بطول اجمالي ٥٧ كم وبيحتوي على عدة عقد مرورية كبيرة وحوالي ٣٤ جسر بتكلفة ١.٧ مليار دولار كندي
المشروع فيه اربع شركات عاملة جوينت ڤنتشر اثنين كنديات وامريكية وفرنسية ...
انا قدمت على وحدة من الشركات الكندية من قبل وما اخدوني وعرفت السبب لاحقا انو هاي الشركة ما بتحب المهاجرين وهي شركة ملكية خاصة لشخص وهو من اشهر الناس الداعمين لحزب المحافظين ولا يوجد فيها ملون واحد بالمشرمحي وبحكيلكون بعدين شوية قصص صارت معي
المهم مالنا في الطويل انا بدأت شغلي بعد تقريبا اسبوع من المقابلة وهون مديري خيرني بين انو اشتغل تحت ايدو في بناء الجسور او اشتغل تحت ايدين مدير كندي من الشركة الكندية كمنسق لاعمال تحويل الخدمات والمرافق الي بتعترض حرم الطريق باعتباري عندي خبرة فيون وانا هون بلا تردد اخترت ابقى معو لانو نصيحة غالية ترا مو المهم الراتب قد انو تكون مبسوط بشغلك
المهم بلشنا الشغل وكان انسان ممتاز بس البنية الهيكلية لادارة المشروع كانت مقسمة بطريقة عجيبة فكان مدير منطقتنا فرنسي والشخص يحكى الحق محترم وكان يشتغل بقطر من قبل فبيعرفنا تماما بس الفرنسيين خبيثين وكان بدو يجيب فرنسي بس لولا نظام المحاصصة بين الشركاء وكان هذا البوزشن لشركتنا وهاد الي كان زاعجو
في الفترة الاولى:
داومنا في مكتب الشركة الكندية لمدة شهرين لبين ما جهزت مكاتبنا في الموقع وكانو فعلا غير مريحين بنظراتن وكان عندي معاناة كبيرة من انو كل ما بتعمل شغلة بتجيني وحدة لا تعمل هيك ولا تساوي هيك وبتحس حالك مراقب على الملي وطبعا مديري كان هو بيشعر بنفس الشعور وكان بس بدو يطلع وصار اول موقف بشع لما سمعت انو بلشو يوزعو سيارات المشروع وطبعا انا ضمن عقدي بيشمل سيارة وبلشت شوف حتى الناس الي اجت بعدي عمبتاخد سيارات فرحت لعند المشتريات وكانت مسؤولة عنها وحدة مو مخلي مكان مو مشخوطة على حالها وشومة مع دبابيس في كل مكان ومعها موظفتين تانيات وسألتها انو هل راح استلم سيارتي اليوم واذ بوحدة بتصرخ فيني بطريقة همجية وبتقلي انا ما عندي سيارات واذا الك وحدة احنا منصحلك وهون انا انصدمت اول شي وخصوصا انو التنتين الباقيات صارو يضحكو واخدت حالي وطلعت بدون ولا كلمة ورحت لاقيت مديري وحكيتلو قلي هاي بما معناه مهسترة خليك بعيد عنها وقلي استأجر سيارة وخليها معك لبين ما تسلتم سيارة المشروع ومندفعلك بعدين ورحت جبت سيارة وبقيت معي شي شهر تقريبا وكان عندي مشكلة وين بدي صلي واول يومين كان في معاناة نفسية بسبب حالة التوتر الي حاسينها فقويت قلبي وحكيت مع مديري فحكى مع موظفة مسؤولة واخذني بعدها على القبو كان فيو جيم وبقلب الجم في غرفة اسعافات اولية قلي صلي هون وسكر على حالك الباب و فعلا بقيت صلي فيه لوقت ما طلعنا على الموقع وصلاة الجمعة شرحتلو الموضوع والزلمي اتفهم الموضوع وماكان عندو مشكلة ابدا وبالعكس الزلمي كان بعض الاحيان يذكرني فيها طبعا مو مدحا فيه بس هو عندو قاعدة انو لازم الموظف عندو يكون مخو متفضي للشغل وبدون ضغوط نفسية وشعارو العائلة اولا ولحسن الحظ كان عندو ولاد بعمر اولادي تماما
في الفترة اللاحقة وبعد ما انتقلنا لمكتب الموقع:
بدأ الشغل وفي البداية كان عندي خوف من الجسور لاني ماني شغال ببناء جسر من قبل بس المدير كان يعطيني اريحية بانو الموضوع مو صعب فالامور كانت هينة وببداية اول ٦ شهور كان معظم شغلنا تحضير ومراجعة مخططات ومواصفات ومنشآت مؤقته وهون اجتني اول فرصة ببناء جسر مؤقت فوق نهر صغير لتمرير شاحنات التراب من حفرة الاستعارة الى باقي اجزاء المشروع وقلي بالحرف الواحد "This is your baby" اشتغلو وانا راح اكون مشرف عليك وهاي تدريب الك لتثبت نفسك ولبعض الناس الي مشككين فيك وعرفت انو قصدو على الفرنسي وبعض الناس في الشركة الكندية كانو بدن يجيبو عالم من جماعة يدحشون في قسم الجسور بس هو ما بدو ياهون وكانو عمبيستخدمو عدم خبرتي السابقة كسبب
المهم بلشت اشتغل بالجسر من بداية التصميمات الاولية الى تحضير المناقصات والمشتريات والتنفيذ وكل هالامور تحت اشرافو وخلصتو في خمس شهور ومشيت عليه اول شاحنة وهون صارلي سمعة ممتازة وبلشت اخد اشياء اكبر كل مرة وهلا مستلم ١٢ جسر في المنطقة تبعتي من اصل ٣٤ جسر في المشروع وتحتي ٢ كندية مهندس حديث التخرج ومساعدة مهندس كمان حديثة التخرج
طبعا في قصص كتيرة صارت ومنها مثلا قصة صارت قدامي عن شخص مقدم سيفيتو اسمو محمد وهاد الشخص اثيوبي وكان مقدم على نفس وظيفتي ولكن في منطقة تانية من المشروع بس كمان مديري حيكون مديرو الاداري بس مش المباشر وكنت انا بالمطبخ عمبساوي قهوة ورجعت على مكتبي وكان مديري وشخص من الشركة الكندية في مكتب جنبي مفصول بفاصل بس بيوصل الصوت وعمبيحكو عن هذا الشخص انو ما راح يقدر يشتغل مع مديرة المنطقة الثالثة لانو مسلم وممكن كتير مشاكل بيناتون وانا هون الحقيقة انزعجت وسمعت هداك الكندي عمبيقول انو لازم نعملو متل فحص حضاري (cultural assessment) لحتى نعرف اذا في مشكلة عندو مع النساء من خلال اسئلة ضمن الانترڤيو وطبعا مديري ما كان رافض الفكرة ولكن كان عمبيركز في النقاش على موضوع انو شخص عندو الخبرة والكفاءة في الجسور وساسكاتشوان وانو مع قلة المتقدمين بدنا حدا بمستواه وهون انا انزعجت اكتر وفجأة بيطلع مديري من الغرفة وبيشوفني وبيصيح لهداك الدب الكندي انو تعى نناقش الموضوع معي وشو رأيي وقلتلو انو انا كان عندي بالامارات مدير اوربي يقلي النسوان بيأثرو على انتاجية العمل وما كان يوظفون فلا تعمم بعدين انتو شفتو وحكيتو معو قلي انا حكيت معو بالتليفون وقوم تعى نشوف سيفيتو ورحنا على كومبيترو وشفت السيفي قلتو هاد ولدان هون ومتعلم هون وعايش كل حياتو هاد "Made in Canada" شو الي مخفوك منو انو اسمو محمد فقط هاد بشكل مطلق ما راح يكون معو مشكلة لا مع النسوان ولا غيرن وبعدين تم مقابلتو واتوظف بالشركة
قصة اخرى عن موضوع اللاجئين السوريين حصلت قدامي ايضا وكان المتحدث ما بيعرفني سوري وكان عمبيسب على رئيس الوزراء وصار يكمل على اللاجئين وانو ليش عمنجيبون هون انا غبق لوني ومديري قلو هاد سوري فطبعا سكت شوي وبيلش يبرر فقلتو انا بتحداك اذا اصلا بتعرف وين سوريا بالاساس وما بواخذك كتير من الناس هون جهلة وبتسمع للاعلام المتحيز ومشيت من الغرفة
الي تعلمو من هالتجربة الى الان:
١- اهم شي يكون الواحد في كندا مبسوط بشغلو ومرتاح والامور المادية تأتي بالمرتبة الثانية
٢- الاعلى منك ب ١٠ الالف ما راح يفرقك عنك شهريا باكترمن ٥٠٠ دولار فلا تفكر كتير الضرايب منشار كل ما بتطالع اكتر الحكومة بتكيف عليك اكتر
٣-العنصرية موجودة بكندا بطريقة خفية والطريقة الامثل لمحاربة العنصريين هي النجق واثبات الوجود بالعمل
٤-لا تسكت ابدا لاي شخص بيحاول ينال منك او من بلدك او من اي شيء مقدس عندك لانو هما بس سكت مرة راح يتمادو اكتر
٥-الالتزام بمواعيد الدوام الصباحية اهم عند الكندية من انو تنصرف بكير
٦-وقت مقابلة العمل لا تطلب اي شيء خاص وانما تركو بعد ما تبدى شغلك وتشوف الوضع كيف
٧-كل عقود العمل الكندية بتسمح بفترة تجريبية مدتها ٣ اشهر يحق لاي طرف انهاء العقد بدون سبب
٨-معظم شركات الانشاءات المحترمة بتعطي تأمين صحي اضافي بيغطي الاسنان والنظارات وبعض الاشياء الي ما بيغطيها نظام الصحة الحكومي متل سيارة الاسعاف
٩-مو كل شركات الانشاءات بتعطي سيارات للموظفين الي بيشتغلو في المواقع
١٠-الشعب الكندي عموما طيب المعشر ونسبة لا بأس فيها ما بيعرف برا كندا شوفي الا من خلال الاعلام الكندي والامريكي الي بيعرض عليهون الامور من وجهة نظرو لذلك لا تتوقعو بيعرفو شي عن سوريا او غيرها
١١-الكنديين مختلفين عن الامريكان كتير ويعتبرو اكثر ثقافة وارقى بمية مرة وانا من خلال شغلي لاحظت هالامر
١٢-الامريكان عمليين اكتر من الكنديين الي بيتمسكو بكتير اشياء مالها طعمة بس متعودين عليها وما بدن يغيروها
بتمنى انو كون عطيتكون فكرة عن طبيعة العمل في البلد عند اي شركة وانا راح اعمل بوست قادم لشرح موضوع الشركات والضرايب ان شاء الله


رؤى الكيال ... من مشاركة المهندس  سامر العبود 

ليست هناك تعليقات

Sora Templates جميع الحقوق محفوظة © Roua Kayal
google.com, pub-4684902950053739, DIRECT, f08c47fec0942fa0