أخبار الموقع

قصة لجوء من الآلف إلى الياء الطريق من جدة إلى مونتريال الحلقة التاسعة .

قصة لجوء من الألف إلى الياء 

( الطريق من جدة إلى مونتريال )

الحلقة التاسعة.



تركنا بعض في الحلقة الماضية و الكل راح ينام بعد رحلة طويلة استمرت اكتر من 15
 ساعة ... غير إنو أنا أصلا عندي كسر نوم يومين اقل شي .. ما علينا صحينا على
 دق الباب فقمت أنا و عم حاول إستحضر مين ممكن يكون عم يدق الباب و إذ المفاجأة 
الجميلة إنو صاحبنا اللي جنسيته من المغرب العربي سلم علي بحرارة و ضمني و قال
 الحمد عالسلامة لا باس عليكم .. و قال لي انو ما قدر إلا أنو يطلع من الشغل
 عالسوبرماركت مباشرة و يشتري شوية أغراض للبيت لعندي مو لبيته تصوروا لبيتي
 أنا ... و الله غرت الدمعة بعيني .. قلت له ليش هيك عملت فقال لي انت لسى جديد
 و انا قلت على بال ما تعرف كل شي و هادا حلال و هادا حرام تحتاج وقت و 
انا عندي عمل و ما أقدر إلا أجيك الا مساءً فحتى لا تنتظرني لبكرا المسا حبيت 
اجيب معاي شوية حاجات للبيت ... و صرخت لإبني الكبير ينزل يجيب الأغراض .
. كانت أكياس كثيرة جدا ... صدقوني البراد تعبى اغراض ... و حتى جايب 
كراتين ماء
 .. قال لي إنتوا في السعودية تشربون من القناني و لكن مياه مونتريال من افضل
 المياه في العالم و لكني احضرتها لكم من اجل اطفالك فقد لا يكونوا معتادين 
على الشرب من الصنبور . صدقوني حمدت ربي و شكرته على هيك صحبة 
قلت لحالي بيضتها كندا .. اذا هيك من أولها معناها لسى الخير لقدام .. عزمت 
عليه يدخل ما رضي و سألني إذا في شي يقدر يعمله لي فقلت لو بدي تلفون 
ضروري ... أخدني و على أقرب مجمع فيه كل شركات المحمول اللي بكندا و قال
 لي أختار لك و لا تختار انت فقلت له أنا مقرر أخود فيدو اشتراك 49 دولار مع 
ستة غيغا انترنت شهريا ضحك من كل قلبه و قال لي شكلك محضر درسك مظبوط .
.. اخدنا هاتف الي و لمرتي و طنشت الأولاد .. قلت لحالي هلق خليني جرب هالشركة 
وشوف شو وضعها قبل ما اخلي العيلة كلها تعلق بشركة وحدة ... مع انو هو نصحني
 ب شركة بل و لكن انا فضلت فيدو لأنها أرخص ...  على الطريق اتصلت زوجته
 و أخبرته انو سوبر ماركت اسمه سوبر سي عامل عروض فما لقيته غير حول 
عليها و هو أخد عربية و أنا أخدت عربية ) هلق حسيت حالي بالسعودية بس هلق 
كل شي بالدولار مو بالريال ) و دخلنا تسوقت بعض الأشياء و أشياء قال لي غالية 
هون لا تاخدها ممكن نجيبها من مكان تاني احسن و هيك اذن العشاء فقال لي شو 
رأيك تصلي في المركز الاسلامي اللي جيت على كفالته انت فقلت له يا ريت فأخذني 
و رحنا للمركز و اخيرا شفت المركز اللي كنت اشوفه بالصور عالانترنت و 
على جوجل ارث و هلق انا داخله تصورت بداخله سلفي و بعتتها للشباب بالسعودية
 و قلت لحالي هلق بس يفيقو رح يفرحوا ... و هيك صلينا و رجعني عالبيت ...
 جيت لقيت الناس قد فاقت و تعشت و رجعت نامت ... فتعشيت انا ومرتي عالخفيف 
و قمنا نمنا لأنو لسى التعب حالل علينا و خصوصا على مرتي ...
تاني يوم نزلنا برنامج اوبر و ربطناه مع الفيزا السعودية و طلبنا سيارة خمس 
دقائق وصلت السيارة ( بالمناسبة في نوعين للسيارات بأوبر سيارات النوع 
الأول بيحمل حتى اربع اشخاص و نوع تاني بيحمل حتى 7 اشخاص طبعا رح
 تختلف تعرفة الرحلة بين النوعين – و في نوع تاني مكتوب عليه الدفع بالمتر
 ما جربته بس إذا إنتوا عندكم فكرة يا ريت تنورونا ) و رحنا على اقرب 
مركز سيرفس كندا قريب عالبيت بالمناسبة كتير سهل تعرف اقرب مركز سيرفس
 كندا لمكان اقامتك ... تفتح صفحة كروم جديدة و تفتح صفحة جوجل مابس و
 تكتب فيها سيرفيس كندا و اضغط انتر رح يعطيك كل المراكز شو اقرب واحد
 لمكان اقامتك و روح عليه ... اول ما دخلنا استقبلتنا موظفة سالتنا عن سبب 
الزيارة خبرناها انو من شان رقم الضمان الاجتماعي فطلبت منا ننتظر لبين 
ما يصرخوا على اسمي .. رحنا الساعة 10 الصبح عالمركز و كان الطقس كتير 
منيح ... المركز كان هادي جدا و فاضي و ما فيه حدا ابدا .. دقيقة وصرخت لنا 
موظفة تانية جيت لعندها و قلت لها نجي كلنا لعندك قالت لي انت بس بالأول بعدين
 رح اطلب زوجتك .. اول شي كانت الموظفة كتير جدية ... بس انبسطت مني 
إني وصلت امبارح و جاي تاني يوم لحتى اطالع رقم الضمان الإجتماعي فقالت
 لي شكلك ما بتضيع وقت ابدا ... قلت لها الوقت اذا ذهب لا يعود و هو لا يقدر
 بثمن ... فأعجبت من ردي و قالت لي رح اسجل هالجملة عندي و بدأت عملها 
فطلبت مني اني اقرا ورقة من صفحتين و أن أقر أمامها أنني اصبحت على دراية
 بما فيها ( المضمون هو ان هذا الرقم هو رقم هام و سيبقى معي طوال حياتي و انه 
من الامور المهمة التي يجب ان لا يطلع عليها احد إلا صاحب العمل عندما 
أعمل – يعني تنبيهات و تحذيرات انو هالرقم شي مهم كتير بحياتك الواحد )  ثم 
قرأت علي إسمي باللغة الإنكليزية حرفا حرفا و طلبت مني التأكيد على صحة 
اسمي و لقبي حرفا حرفا فأجبتها بنعم ... و فعلت نفس الخطوات مع زوجتي و
 أطفالي بعدين طبعت لي الأرقام على ورق A4  وقالت لي ما عاد نطبع على 
بطاقات بلاستيكية من كم شهر و أصبحت الأرقام على ورق ... ( طبعا انا مخطط 
إني أجلد الأوراق اللي اخدناها من سيرفس كندا  مع أوراق الاندينغ مع أوراق
 اختيار مقاطعة كيبيك تجليد حراري قاسي من شان يحفظهم من الحك و التغيير
 و عوامل الطقس و التكسر لأنو بالنهاية هنن أوراق ... طلعنا من مكتب سيرفس كندا 
و تمشينا شوي بالشارع لبين ما تعبنا .. كانت مشوة حلوة كتير و كان الطقس غير 
شكل ... ضلينا هيك ليبن ما بلش النق من الشباب فطالعت الجوال و طلبت اوبر
 و خلال دقيقتين وصلت السيارة و صرنا بالبيت ... و نحنا داخلين عالبيت لفت 
انتباهي وجود كيس بلاستيك جنب باب البيت فتحتو و اذ فيه العروض – شي 
خمسين عرض لكتير محلات  أثاث و سوبرماكت و كهربائيات ( وين أيامك يا جدة ) 
دخلتها و شافتها مرتي و هون بدأنا رحلة التعرف على الأسعار و مقارنتها 
بالسعودية ... من نعم الله انو كان قريب علينا كتير وال مارت و دولاراما و ماكسي .
. موجودين بنفس المول فقلت لها لمرتي شو رأيك بجولة فتركنا الشباب بالبيت 
لأنو طول الطريق شغالين نق بدهم يرجعوا يلعبوا مع رفقاتهم اونلاين ... تركناهم 
و نزلنا مشي .. 3 دقاىق كنا جوا ... و هون بدأت الرحلة .. كل ما تمسك مرتي 
شغلة تقول لي ياي هي بجدة أرخص ... و قضيناها يايات طول فترة الجولة  ... 
ما اشترينا شي لأنو البراد مليان بس اخدنا فكرة كتير منيحة خلاصتها إنو 
العروض كتير حلوة وممكن اللي عندو عيلة يوفر كتير بالعروض و يضرب 
ضربته بس بدها سيارة لحتى الواحد يعمل جولة سريعة يشيل العروض .... و 
ما خبرتكم شغلة جبنا معنا طحين لأنو مرتي حلفت الف يمين ما بتشتري الربطة 
عند ماكسي ب 3 دولار ولو شو ما صار و لان شافت الربطة بسوبرماركت تاني
 اسمه مارشيه بدولار فقالت لي بكرا روح جيب من عند مارشيه و انا رح أخبز
 بالبيت اليوم و يا عين على هيك خبز تعشينا عليه اول عشاء على رواق ... هون
 رح اترككم و بنلتقي بكرا ان شاء الله ...

متابعة م  خالد الغدير 


ليست هناك تعليقات

Sora Templates جميع الحقوق محفوظة © Roua Kayal