أخبار الموقع

قصة لجوء من الألف إلى الياء الطريق من جدة إلى مونتريال الحلقة الثامنة

قصة لجوء من الألف إلى الياء 

( الطريق من جدة إلى مونتريال )

الحلقة الثامنة.



ختمنا في الحلقة الماضية عند وقوفنا على مدخل باب المطار اللي طالما كنت أدخل 

عليه على جوجل ارث و اتفرج عليه و الأن أصبح الحلم حقيقة صرت جوات المطار

 ... مندوب الكفيل اجى بعد خمس دقائق و سلم علينا و خبر الموظفة إنو تمشي و انو

 هو رح يتولى الموضوع .....  و قاللي انو رح يوصلني بالأول لأن موقع الشقة اللي 

إستأجرتها قريب كتير من المطار ( الله ما حرمني المطار بجدة بيتي 5 دقاىق عن 

المطار و بمونتريال هلق 3 دقائق عن المطار )  ... طبعا اتوقعت إنو أي واحد من 

المتابعين يسأل ليش ما جبت سيرة المكان اللي رح انزل فيه انا و عيلتي بس ما حدا 

انتبه لهالشي بس انا اتقصدت اخليه للأخير لأن إلو قصة غير شكل  .

رح احكيلكم عن هالتجربة قبل ما ابدا باللحظات الأولى في كندا

.
في البحث عن شقة مفروشة استعنت بكم موقع منهم موقع Airbnb  

و منهم KIJIJI   و كمان إستعنت بصديق مقيم بمونتريال جنسيته من المغرب العربي 

تعرفت عليه عالفايس و بصراحة وقف جنبي وقفة أخ حقيقي بحب وجه لو تحية حب 

و وفاء و شكر لكل شي عمله قبل وصولي و بعد وصولي ( في ملاحظة كتير مهمة 

إذا بدكم تستأجروا اكثر من اسبوع خلوا حدا بمونتريال يروح يشوف المكان بعينه 

لأنه الصور تختلف اختلافا جذريا عن الواقع و أنا جاهز لحتى اخدمكم بهالموضوع

 و روح شوف بعيني اي مكان تختاروه واعطيكم رأيي قبل ما تتورطوا و تستأجروا 

طبعا  بالتنسيق مع الأخ خالد الغدير ) ... بصراحة عالمواقع كان الاجار غالي كتير 

و خصوصا اني اتفقت مع مرتي اني استاجر شهر كامل مفروش لحتى نرتاح صح 

و ندور على بيت صح ... و هون استعنت بصديقي اللي ذكرته قبل شوي و 

بدأ إتصالاته مع كل معارفه و صار يروح يشوف الشقق و يصور لي و يبعت 

لي الصور و شي يعجبه و شي ما يعجبه  لبين ما عجبني و عجبه بيت بسان لوران 

منطقة زحمة و فيها عرب كتير و فيها كل شي و مخدمة صح فقلنا خير و اتفقنا

 مع صاحبه و كل شي تمام و راح صاحبي شاف البيت و كل شي تمام لهون و

 انا اطمنت انو الأمور تجري على ما يرام ... و إذ بيتصل فيني صاحب البيت 

قبل سفري بثلاثة أيام لحتى يخبرني إنو ما بيقدر يسكني بالبيت و إنو لازم أشوف 

مكان أخر ... عن جد كان فيني عقل و طار و قلت لحالي من أولها ما توقعت انو

 في حدا بكندا يرجع بكلمته .. على كل الأحوال هون كان لازم نعمل غرفة 

علميات طوارىء لأن باقي على سفري 72 ساعة و فرق التوقيت اكتر من سبع 

ساعات و كان علي إني أعيش هالايام الثلاثة بتوقيت مونتريال و ليس بتوقيت جدة 

هادا أول شي تاني شي و كونه صديقي اللي حكيت عنه اول الحلقة عنده عمل 

من الصبح للساعة ستة فكان عليه كتير صعب اني اعتمد عليه فهون كان لازم 

احول إلى الخطة ب و هي الإتصال بصديق صديقي ... بصراحة صديقي اعطاني

 رقم صديقه في مونتريال و طلب مني اني احكي معه و بعت لي رقمه من اكتر 

من شهر بس انا ما حبيت اني اعذبه معي خصوصا انو في مين عم يساعدني بس 

لما شفت الوقت ضيق قلت لازم استعين بصديق صديقي و خصوصا انه عزابي و و

هو مشغول بالمدرسة من الصبح للساعة 12 و بعدها ما عندو شي و خلال 

هالايام الثلاثة تحولت حياتي اليومية الفعلية لتبدأ من الساعة 7 مساء و لتمتد

 الى لحظات الفجر الأولى حتى اتمكن من استغلال اكبر وقت ممكن من وقت 

العمل الفعلي في كندا ...اتصلت على صديق صديقي و اسمه .. محمد ج و عرفته 

عن حالي و اني اخدت رقمه من فلان و خبرته عن وضعي الحالي و شو صار معي 

و قلت له الموقف بين ايديك شو فينا نعمل فقترح علي انو نلجأ لموقع KIJIJI  و 

نبدأ ندور على طلبنا وأي مكان بنلاقيه مناسب رح يتصل عليه و كون لغته الفرنسية 

و الانكليزية منيحة فهالشي سهل علينا نتصل على اي حدا ( بالمناسبة محمد صار

 له بس 11 شهر بكندا و عم يتعلم فرنسي ) ... و من خلال برنامج استخدمته 

اسمه Critix GoToMeeting  بدنا اجتماعا مفتوحا وأنا أبحث عالموقع و محمد

 يرى شاشة جهازي عنده في مونتريال و يسمعني و اسمعه من خلال هذا البرنامج 

و صار محمد يتصل بالناس واحد واحد .. و الكل يقول له انا ما بأجر إلا سنة كاملة 

... لين ما لقينا واحد رضي يأجرنا شهر بس محمد الله يجزيه أصر يروح يشوف 

البيت بنفسه فركب المترو وصل عند الرجل بعد شي ساعة و حكى معي من هونيك 

انو البيت ما بينفع الي و لعيلتي من كل النواحي المكان و الجيران و البيت نفسه

 و رجعنا لنفس الدوامة... و قضينا اليوم الأول بدون فائدة ... في اليوم التالي 

بدأنا الإجتماع المفتوح اول ما رجع من درس الفرنسي يعني حوالي 12

 بتوقيت مونتريال الساعة 7 بتوقيت جدة ( أصلا انا نمت عالفجر و صحيت قبل 

العصر من تعبي ) و بدأنا مرحلة البحث من جديد و كله على موقعKIJIJI    لبين 

ما الله وفقنا الى شخص حاطط بيت 3 غرف منامة مفروش قال لي محمد لازم اروح 

اشوف بعيني مع انو المنطقة هونيك معروفة انها منطقة كتير اكابر و كلها فلل راقية 

بس لازم اروح اشوف بعيني و فعلا طلع محمد و راح بالمترو و الباصات اكتر من

 ساعة و ربع و حاكاني من عندو و قال لي الموضوع كتير مريح بس ما في تلفزيون

 بس ما عندنا وقت نحط شروط لذلك انا شايفه كتير مريح ( و بيني و بينكم شهر بدون

 تلفزيون خلى العيلة تقعد مع بعض اكتر و تتحرك مع بعض  اكتر و يروحوا عالحديقة 

و يتمشوا اكتر يعني انا استفدت من موضوع بدون تلفزيون ) ... و خبرني محمد انو

 المكان منيح من ناحية عدد الغرف و السعر كمان بس فيه شرط واحد انو اول يوم 

محجوز فلازم تنزل بشي فندق و تاني يوم تجي ... بس انا لقيتها صعبة كتير كتير 

و هون طلبت احكي مع صاحب البيت صوت و صورة و عملنا كول فيديو و سلمت 

عليه و قلت له انا معي عيلة و جاي بكرا و ما بدي اتشندل بين الفندق و بينه و 

معي 16 او 17 شنطة كبيرة و صغيرة و على نزل و طالع و عرفته عن حالي اني 

انا سوري و الحكومة ساعدتني لأجي لهون و بدي انت تساعدني تلغي هادا اليوم 

مع هالزلمة و انا بتحمل اي شي هون لقيت الزلمة صفن و قال لمحمد اترك لي رقمك 

و رقم صاحبك بالسعودية و انا رح خبركم اذا بقدر الغي هادا اليوم و اعطيكم ياه . 

و طلع محمد من عنده و انا رفعت ايدي الى الله  و طلبت منه المعونة لأنه اول ليلة 

الها كتير تأثير بنفس العيلة و الأولاد ... بعد حوالي نص ساعة اتصل فيني الزلمة 

من كندا على موبايلي من شان يأكد لي انو الغى حجز اليوم الأول و انو فيني انزل 

من اول يوم عنده و طلب مني اني احكي مع محمد يحول له المصاري ( 1800 

دولار بالشهر ) محمد فورا نزل من المترو و حول طريقه لعنده مرة تانية و 

وصل لعنده  و عطاه رعبون 500 دولار و قال له بس توصل العيلة من جدة رح 

يكمل لك المبلغ و هيك انتهى فيلم الرعب اللي قضيته خلال ال 72 ساعة ( و 

هون بحب قول لمحمد إني أحلت مكافئته على ما فعل معي إلى الله ليكافئه لأني شو 

ما عملت ما رج اقدر أرد له هالوقفة اللي وقفها جنبي ) .. و ما تتصوروا قديش كانت

 ساعات عصيبة ... بس الحمد لله اللي فرجها بعد هالضيق اللي مريت فيه ..
.
نرجع هلق للحظة خروجنا من مطار ترودو بمونتريال ... في مطار مونتريال لقيت فيه 

انترنت مجاني و هون شبكت عالنت و طمنت كل الناس على اننا وصلنا بالسلامة لأن 

كان في كتير عالم من الأهل والأصدقاء عم تتابع رحلتنا و ناطرة تضمن علينا ابتداء

 من كوريا لتركيا لمصر لسوريا للسعودية  بس الأحلى اني لقيت مسج من صاحب 

البيت انو المفاتيح في علبة البريد و انو اضطر يسافر و بيرجع بعد 5 ايام و بيعتذر 

انو ما قدر يستقبلنا ... طبعا العنوان معي .. اعطيته لمندوب الكفيل و خلال 3 دقائق 

كنا قدام البيت .. طلعت لصندوق البريد و لقيت نسختين مفاتيح اخدتهم و فتحت الباب 

و هون نزلنا الشناطي و طالعناهم لفوق لانو البيت هو القسم العلوي من فيلا دوبلكس

 ... البيت كان منور كتير لأني وصلت الساعة 10 الصبح و بنفس الوقت المنطقة

 هادية جدا جدا و رواق غير شكل .. قريب من البيت اكبر 3 علامات مهمة بكندا 

وال مارت , ماكسي  , دولاراما ... فقط ثلاث دقاىق مشي و هي لحالها نعمة من

 نعم الله التي لا تعد و لا تحصى ...المطبخ كان فيه كل شي و الغرف فيها سراير 

مرتبة و معقولة و مفروش فرش طبيعي لا هو توب التوب و لا هو عالأرض 

يعني فرش طبيعي بس كل شي نظيف و ريحة حلوة  فحمدت الله و شكرته على 

أن أوصلني الى هنا في لطف و عافية ... أول جملة قلت لها لمرتي ... هي مفتاح 

البيت أنا داخل أنام و انتوا اعملوا شو ما بدكم فقالوا لي انو بدهم يرتاحوا هنن 

كمان .. فدخلنا كلنا نمنا و ما صحينا لبعد الساعة 7 مساء ... و هون بنكمل بكرا

 إن شاء الله ...

متابعة م. خالد الغدير 


ليست هناك تعليقات

Sora Templates جميع الحقوق محفوظة © Roua Kayal