أخبار الموقع

قصة لجوء من الألف إلى الياء ( الطريق من جدة إلى مونتريال ) الحلقة الحادية عشر.

قصة لجوء من الألف إلى الياء 

( الطريق من جدة إلى مونتريال )

الحلقة الحادية عشر.





في الحلقة الماضية وقفنا على موضوع شراء السيارة ... و لكن في أشياء حابب احكي عنها قبل ما  
احكي عن موضوع شراء السيارة لأنها حصلت لي أثناء البحث عن سيارة ...
في البداية حابب أحكي عن ظاهرة غريبة لاحظتها بعد ما زرت مطار ترودو مرتين غير المرة 
اللي نزلت أنا فيها .. يوم اللي نزلنا أول مرة كان المطار فاضي و كان صباح يوم إثنين و لما 
طلعنا لبرا كانت الساعة تسعة الصبح و كان المطار فاضي تماما من الناس و انا كانت اللحظات 
الأولى إلي لحظات إستكشاف  لذلك ما لاحظت اللي هلق رح قوله ...
بصراحة لاحظت من حضوري و إنتظاري لعائلتين سوريتين إجوا الى مونتريال ..عائلة من 
السعودية و عائلة من مصر شغلة كتير غيرت من نفسيتي و خلتني أفكر كتير بهي الظاهرة ... أنا 
في الحالتين طلعت بكير عالمطار مع إنو كل الناس قالوا لي انو بدهم ساعتين ليطلعوا بس أنا 
عندي قناعة و مصر عليها إني أصل بكير و أنتظرهم و حتى لو تأخروا بالطلعة أحسن ما يطلعوا 
بكير و ما يلاقوا حدا قدامهم ... اللحظات الأولى لأي شخص جاي جديد على بلد سواء في كندا أو 
غيرها  كتير مهمة على نفسية الانسان ...  إنك تشوف حدا عم ينتظرك ... كيف إذا كان بيحبك و 
في بينك و بينو ود كبير ... أنا كنت خبرتكم إني كنت ساكن بجدة جنب المطار ( سبع دقائق عن 

بيتي )  و بحكم معي سيارة كبيرة كان أي حدا بدو يسافر يخبرني من شان إما أطالعوا عالمطار
 أو استقبلوا و كنت كتير أطلع إستقبل رفقاتي و أهلي و كتير عالم و كنت كتير أراقب الناس اللي 
في المطار بجدة أو حتى بمطار دبي بس اللي شفته بمطار مونتريال كان مختلف كلياً ...  ما علينا 
أنا شرحت كل هالشي لأني في المرتين اللي طلعت فيهم لمطار ترودو قضيت من ساعتين إلى 

ثلاث ساعات إنتظار قدام بوابة الخروج و ما كان عندي شي غير إني راقب الناس اللي عم تطلع 
و الناس اللي واقفة عم تنتظر الناس اللي عم تطلع .. بس الشي العجيب و اللي أذهلني فعلا 
كمية الحب اللي كان موجود في إستقبال الناس اللي منتظرين المسافرين ... كان الحب الموجود 
في كل لقاء بيكفي بلد .. أنا اول مرة بشوف دموع لقاء و بكاء ، بشوف ناس عم تحضن بعض بشوق مو طبيعي ... أب و إبنه ، أب و بنته و حفيدها ... جد و جدة بيشوفو ابنهم و زوجته 
و حفيدهم لأول مرة شكله ...  شي اجانب و شي عرب .. كتير مواقف خلتني نسيت ليش 
جاي خلتني اقعد تابع بس كل واحد طالع وشوف الفرحة اللي رسمها على وجوه كتير 
ناس منتظرينو برا ... و شوف ردة الفعل منهم الو ... كان شي بيدخل الفرح .. و فعلا شي
 أدخل السرور إلى قلبي و غير من نفسيتي ....
الشغلة التانية اللي بدي شارككم ياها و اللي لفتت إنتباهي ... هي موضوع الباص و الركبة فيه ..
. أول شي طبعا أنا ركبت بالباص يمكن خلال هالثلاث أسابيع شي مليون مرة و الخلاصة 
اللي بدي شارككم ياها إنو الناس اللي عم تسوق الباص فعلا قمة في الرقي و الأخلاق ... 
و رح أعطيكم بعض الأمثلة ...
-          مرة قلت بدي روح على سامي فروت و على قد ما ئكروه الصبايا بالمجموعة 
قلت خليني زوره و شوف شو الوضع طالعنا عمو جوجل ماب و لقيت إنو الباص اللي
 قدام باب بيتي ( 25 متر بس ) بيوصل لقدام سامي فروت .. قلت لحالي عظيم و شفت انو
 في باص جاي بعد ربع ساعة  ... نزلت وقفت عالموقف ... خلصت الربع ساعة و ما 
إجى الباص قلت لحالي أنا نويت روح و ماني رجعان رح انتطر الباص اللي بعده  يعني 
بعد نص ساعة ... المهم بعد نص ساعة اجى الباص اللي بعده و اذ هو نفس الباص اللي 
هلق راح بالإياب رجع لعندي ... طلعت بدي أدفع مصاي فقام السائق حط ايده على 
ماكينة المصاري و قال لي لا تدفع و طالع لي بطاقة و حاكاني بالفرنسي ما فهمت من
 الجملة غير كلمة كادو ...  رديت عليه بالإنكليزي فجاوبني بالإنكليزي إنو أنا و رايح
 شفتك واقف عم تنتظر ونظرا لإنتظارك الطويل فالبطاقة هي هدية اليوم إلك و نعتذر 
عن وقوفك الطويل ... صدقوني ما لقيت كلمة تنقال بهيك موقف ... انربط لساني و 
شكرته فقال لي نحنا اللي لازم نعتذر لإزعاجك ...
-          و بما إنو الجامع القريب من بيتنا يبعد اربعة كيلو فأنا على جمعتين متتاليتين
 كنت أخود باص من شارع قريب حوالي 300 متر لحتى أروح على صلاة الجمعة 
وفي الجمعة الأخيرة تأخرت شوي حوالي دقيقة على موعد الباص فلما قربت اوصل
 من الموقف لقيت الباص واصل و تحرك من عالموقف شوي و وقف الباص لحقته و
 طلعت فيه فشكرت السائق على إنو وقف فقال لي أنا توقعت إني لاقيك و إنتظرت 30
 ثانية لعلك تظهر ... بصراحة حسسني إنو مهتم مع إني أنا بس طلعت معه مرتين 
على جمعتين فقط.
هلق بدنا نرجع لموضوع شراء السيارة ... أنا زرت كتير معارض سيارات جديد و 
مستعمل ... بس الخلاصة هي كما يلي .
-          طبعا الجديد مافي أحلى منو و أي حدا عندو القدرة يتشري جديد ما يقصر أبدا ... 
بس شراء سيارة مستعملة بأول فترة بحياتك بكندا هو خطوة كتير جيدة خصوصا إنو أول 
فترة ما رح يكون في عندك مشاوير غير السوبر ماركت ، مدرسة الأولاد ، مدرسة الفرنسي 
( و بالمناسبة هدول رح يدفعوا لك كرت الباص ) ، و كم زيارة عائلية بالشهر إن وجدت 
لذلك أي سيارة مستعملة نظيفة ميكانيكيا ومن الداخل ( و لو من الخارج بيكون احسن بس 
مو شرط ) رح توفي الغرض لأن المصاريف الأولية ( دفع اجار بيت ستة اشهر و فرش 
البيت غير مصاريف المدراس اللي جاية بوجهك مباشرة )  رح تكون كبيرة عليك خصوصا 
اذا افراد العيلة عددهم كبير ...
-          السيارة المستعملة عليها ضرائب متلها متل غيرها فالمستعمل أقل من عشر سنوات
 لو حطيت سعر غير واقعي ما يعتمدوه و رح تكون الضريبة حسب السعر اللي بيشوفوه 
مناسب لحالتها أما المستعمل بعد ما تعدي عشر سنوات رح تكون ضريبتها حسب السعر اللي
 انت حاطه حتى لو كان غير واقعي و ما حدا رح يدقق لذلك هي كمان رح تفرق معك .
-          التأمين كمان على القديمة رح يكون اقل من الجديدة ...
-          حاول ما تخبر حدا و لا أي حدا إلو علاقة بموضوع شراء السيارة إنك جاي 
من الخليج ...  لأنو للأسف الشي اللي أنا شفته و لمسته ( و لا أعمم ) إنو كل واحد بيعرف 
انك جاي من الخليج رح ينظر إليك و يتعامل معك على أنك الكيس الممتلىء اللي قد ما 
فيه لازم يغرف منه و اللي بيسوى الف بيصير بألفين و هكذا بيصير بدو يلزقك يسارة من 
عندة نظيفة و لا مو نظيفة ما بتفرق المهم ما تهرب منو و بتصير كل سياراتو غير شكل
 و كلها مافي منها و فهمكم كفاية ... لأ و كمان صار في بعضهم يعرضوا علي المنيح
 و التعبان على انو منيح و  تعاملوا معي على إني أهبل بالسوق الكندي و مو عارفين إني 
من على بعد الاف الكيلومترات اطلعت و قرأت و أخدت فكرة تامة شو اللي بينشرى و 
شو اللي ما بينشرى بهي البلد خصوصا للواصلين الجدد .. لذلك قررت إني ما خبر حدا من 
وين انا جاي بالعكس لازم يفهم الشخص اللي رايح تشوف سيارات عندو إنو المصاري اللي 
معك عالقد و مافي زوايد .
-          عدد أفراد العيلة رح يلعب دور بنوع السيارة . لأن بكندا كل فرد من أفراد 
العائلة لازم يكون له مقعد و حزام امان . مو متل عندنا ببلادنا طلعوا و دبروا حالكم ... 
حتى الطفل تحت سن عشر سنوات لازم يكون في الو كرسي سيارة بالسيارة لحتى يطلع معكم 
و عليه مخالفة غير شكل لو في ولد اقل من شعرة كان قاعد قدام او قاعد ورا بدون كرسي 
سيارة ... و مافيك تقول باخد ناس و بخلي ناس بالبيت لأنو مافيك تترك أطفال تحت سن 
العشرة او 13 ( مومتأكد من العمر ) بالبيت لحالهم لأنو الجيران ممكن يتصلو عالشرطة و يخربو بيت الشخص ... بقى العدد رح يلعب دور لأن أي روحة إنت و المدام لازم تشحطوا معكم اولادكم خصوصا إذا كان مافي كبير يرعاهم بالبيت ...
-          النقطة المهمة بهالبلد الحلو هو البنزين ... الليتر ب دولار و شوي يعني 3 درهم أو
 ريال ... لذلك سيارة بمحرك صغير 1.8 او 2  رح تفرق معك كتير بالمصروف عن سيارة 
3 أو 3.6 و هكذا ...
-          هلق النصيحة اللي بدي قولها هون للكل و قد يختلف معي البعض و قد يتفق ...
 بالنسبة للسيارات الصغار عليك بتويوتا سواء كانت يارس او كورولا و هوندا سيفيك ... هلق
 اي سيارة صغيرة منيحة بس هدول سيارات متل الشيك اول ما  تعرضها الف مين بيتشريها 
... هي للي عيلتو عددها خمسة على ابعد حد .. أكتر من هيك أنا بفضل إنو يطلع للسيارة 
الأكبر واللي هي سيارة سبع ركاب و أنصح ب دوج كرافان أو تويوتا سيينا أو هوندا اوديسي
  ... تويوتا و هوندا غاليين بشكل عام لأنو مرغوبين و مطلوبين و محافظين على سعرهم . 
بس أنا لو بدي أختار أختار دوج كرفان لأنو سيارة شعبية و قطع غيارها متوفرة و الكل بيفهم 
فيها و سعرها كتير منيح ...
-          في نصيحة تانية .. إذا بدك تاخد السيارة لحتى تضل معك فترة منيحة إبعد عن 
المازدا لأنو الصدأ رح يطلع عليها عاجلا أم أجلا .. و هي غير مرغوبة هنا .. و كذلك ابعد 
عن الاوروبي و الألماني بشكل عام ... بيعه صعب ... و تصليحه أصعب و غالي جدا .. 
بالمناسبة أجرة التصليح تدفع بالساعة و ليس بالمفاصلة و ساعة الألماني تختلف جذريا عن 
ساعة الياباني او أمريكي .
-          أحسن شي إنك تشتري من الأشخاص الكبار بالسن ، هدول بكون معهم سيارات 
مرتبة غير شكل صحيح ممكن ما تلاقيها فل اوبشن بس بيعتنوا فيها كتير و رح تخدم معك 
منيح .
-          موقع كي جي جي موقع كتير منيح .. رح تلاقي فيه كتير عروض ... نصيحة بعد 
عن السيارات اللي عارضينها معارض السيارات و الشريطية ( و هي جملة تستخدم في 
السعودية للدلالة على الناس اللي بيشتغل ببيع السيارات بمفرده و دائما ما يبخس سعر السيارة 
و بعد ما يشتريها بيظبطها و بيخبي شو فيها عيوب و بيلزقها بأول واحد غشيم )  ... طبعا في 
طريقة حلوة كتير لحتى تعرف الشريطية من الموقع اللي بدو يعرفها يحكي مع المهندس خالد 
و هو رح يدله عليها ...  إنت ركز على السيارات المعروضة من قبل مالكين و بعد ما 
تتأكد إنو مو شريطي روح و شوف السيارة عالواقع و خدها و فحصها عند ميكانيكي ب 25 
او 30 دولار .. و خود رأيو فيها بالأول و انت ماشي قول له يعني كام أخرها برأيك ...
  مجرد استنارة برأي الميكانيكي و إذا عجبتك فاصله شوي و خدها نور الله طالما سعرها 
قريب من السعار اللي شفتها بالموقع .
-          الخلاصة انا من ناحيتي ما توفقت لهلق بسيارة تحت ال 5000 دولار ... بس عم 
روح شوف سيارات ... بالمناسبة طلعت كرت الباص المفتوح ( بطاقة قيمتها 6 دولار لمرة 
واحدة ، و شحن لمدة شهر ب 83 دولار ) , كل شهر بتشحن ب 83 دولار و فيك تركب فيها 
كل أنواع الباصات وا لمترو داخل مونتريال فقط ( منطقة لونغويل و لافال الهم سعر تاني ) 
طبعا في أي وقت رح تشتري الكرت و تشحن ب 83 دولار رح تنتهي صلاحية الشحن على 
أخر الشهر فإذا جيت لكندا بأواخر الشهر إنتظر لأخر يوم بالشهر و اشتري بطاقة و إشحنها 
و رح تشتغل عالساعة 12 بالليل و هيك فيك تستخدمها شهر كامل تماما ...
طولت عليكم سامحوني وفي كتير أمور بدي أحكي لكم عنها بخليها للحلقة القادمة إن شاء الله ...

ملاحظة : يتواصل معي البعض من أجل معرفة صاحب القصة أو اسم المركز ...نحن في الموقع 

نقوم بنقل القصة ولا نستطيع ذكر اسم صاحب القصة بناء على رغبته ....

مع تمنياتي للجميع بالتوفيق ...م . خالد الغدير 

ليست هناك تعليقات

Sora Templates جميع الحقوق محفوظة © Roua Kayal